(Source: ourmistakesandfl4ws)
167الثلاثاء
14-5-2013
النهاردة من الايام الحلوة, مش بس الطيبة, لأ الحلوة
المبهجة و الجديدة و اللطيفة
صحيان الصبح بدري رغم اني نايمة متأخر ماكنش حاجة مرهقة لاني عارفة اني نازلة اعمل حاجة حيترتب عليها تنفيذ حاجة تانية بحبها و عايزها تكبر و تكمل
و عشان كنت عارفة اني نازلة اقابل ناس جديدة حلوة و ارواحها سابقها لقلبي
كنت عارفة بشكل تلقائي كده اني حلبس فستان, حاجة زي ما يكون لا واعي عارف ان اليوم مبهج و عايزني ابقى لابسة حاجة لطيفة
فستان ملون و جاكت ملون و طرحة ملونة و خلخالي الجديد اللي كان مرمي ف الصندوق الخشب من ساعة ما اتجاب من فترة
دعاء عبد السلام و نهي صبحي
اسامي انا عارفها كويس و ناس بسمع عنها من ناس بتجيب دايماً ف سيرتهم بالخير, بس اول مرة تجمعنا قاعدة
و ماكنش فيه اي حاجة غريبة كأننا نعرف بعض من سنين, الحكي و المناقشة و الكلام و الضحك كانوا جايين من غير مجهود
الارواح كانت مرتاحة و مبسوطة و كان فيه ضحك من القلب
رانيا اللي بحس اني دايماً عايزة احضنها عشان اطبطب عليها و نور اللي اول مرة اتعرف عليها بس وشها مريح لدرجة تخليك حاسس انك مش قاعد مع حد غريب عن روحك خالص
القاعدة اللي كانت المفروض تخد ساعة, قاعدت تلت ساعات و شوية
بعدها رحنا نشوف ال
“Street Museum Project”
اللي نهى و اصحابها عملينه ف الازريطة , نهى كانت عايزة تشوف اللوح حصل فيها إيه عشان تعرف رد فعل الناس على وجود الصور ديه إيه
لقينا الموناليزا متبهدلة و مرمية ف الارض, متقطعة عمداً
الغريب ان نهى كانت بتضحك و عمالة تهزر ع الموضوع, و احنا كنا بنشاركها الضحك و عمالين نتصور جمب اللوح و نتصور و احنا ماسكين اللوحة المقطوعة و عمالين نتكلم ف مواضيع تالتة بعيدة خالص عن اللوح و ف النص نرجع نضحك على اللي حصل للوحة
و انا مروحة كنت بفكر إيه اللي ممكن يبقى احلى من انك تقابل ناس ترجعك تاني تؤمن ان فيه بني آدمين نضيفة, و إيه احلى من ان حاجات بسيطة ترجعلك احساسك بالامل و انك عايز تعافر تاني
النهاردة انا حاسيت بكل نسمة هوا كانت بتمر على قلبي, و انبسطت بالبنات الحلوة و رجوع صداقة مهمة و ونس لحياتي
و ضحكت من قلبي
و غسلت بكل الحب و الطاقة و الونس و الدفا دول روحي :)انا فعلا بحبكم يا بنات و مبسوطة بيكم
أكيد فى عالم موازِ كنا هنبقى عايشين على كوكب وحدنا و هنجمع ناس من اللى بيعملوا كل حاجة فى الدنيا بعيداً عن المثقفين و بعدين نشتغل و نلعب و نرقص و نهيص و تبقى حياتنا متشقلبة و نصدر اللى بنعمله للكواكب التانية .. انا حبيتكوا قوي يا بنات
*عن رنولا و خضرا و نرجس أتحدث
Blind Kitten Plays with Toy for the First time
So cute, you’ll wish you were blind, too.
